كيف نصلح او نعالج الايلاينر الجاف و القديم ؟

مساء النور

رجعنا للمدونة من جديد

ان شاء الله كلكم تكونو بخير 

اليوم جبتلكم مجموعة حلول للايلاينر الجاف و المتشقق

الي تستخدم في الجيل ايلاينر أكيد واجهتها المشكلة هذي و قالت خلاص فسد و مش حنقدر نستخدمه ثاني

بالعكس في حلول بسيطة و موجودة عندنا في البيت و أولهم :

الحرارة

تاخدي عبوة الاي لاينر و تسخنيها شوية اما بالسشوار (مجفف الشعر) او في المايكرويڤ

او تحطي العبوة في إناء فيه مياه ساخنة بحيث الجيل لاينر يدوب شوية و معاش يقعد جاف

تحذير:

لو تبؤ تستخدمو المايكرويف .. انتبهو ان الايلاينر ما فيشي اي لون فضي و لا اي سيلفر و ايضا شوفو الحرارة و ما اديروهاش عاليةجدا 

ثانيتين كفيلات بانهم يذوبوا الايلاينر   .. يعني ما تخلوش لفترة طويلة 

المحاليل الكحولية/سوائل:

تقدرو تحطو شوية من قطرة العين، او الجلسرين في الايلاينر و تُخلطوه و تشوفو كيف يرجع جديد

ثالت فكرة هى أنكم تقدرو تحطو شوية جيل فازلين و تخلطوهم.

او تحطو قطرات من زيت البيبي زي جونسون و نفس الشي تخلطو عشان يمتزجو مع بعض

طبعا لازم تحطو في بالكم ان الي تقعد عايشة في بيئة حرارتها عالية الآي لاينر حيقعد جديد معاها لفترة أطول على عكس ان البلاد الي تكونو عايشين فيها باردة و حرارتها منخفضة جدا حيكون الايلاينر معرض انه يجف بشكل أسرع

حاولو ادفوه شوية ، انا قبل ما نستعمل الاي لاينر نحب نحركه بين ايديا شوية بش نعطيه حرارة و يكون جاهز للاستخدام

اخر شي نبي نحكي عليه الي هو الدورلاين ... عبارة عن محلول سائل متعدد الاستخدامات 

و من فوائده إنكم تقدروا تحطوا قطرات منه على الايلاينر الجاف و هو حيعالج المشكلة و حتشوفوا بعيونكم سواد الايلاينر و كيف يقعد سهل الاستخدام

يعني لو تبوأ تصرفوا زيادة فلوس خودوا الدورلاين من إنجلوت مع الايلاينر المفضل عندي 

و حتكونوا ارتحتوا بعون الله 

و هذي صورته   

احلى جيل ايلاينر استخدمه كان من ماركة انقلوت/إنجلوت

Inglot AMC Eyelner 77

بصراحة ممتاز، سواده غامق و قاتم جدا، قوة تحمله يدوم لفترة طويلة بدون ما يسيح و لا يدوب حتى في المناطق الساخنة  

يعني مناسب جدا انك تستخديمه في المناسبات بدون ما تخافي انه يتحرك من مكانه و يدوب

السعر ايضا كويس بكل بالنسبة ان الجودة عالية جدا

بالذات في موسم التخفيضات يقعد رخيص 

ماركة انجلوت/انقلوت متوفرة في طرابلس ليبيا على ما اعتقد في بن عاشور  و حى الأندلس 

أما لو كُنتُم في نيوكاسل مثلي او في اي بلاد غير ليبيا ، حتضطرو تأخذون اونلاين من الموقع هذا 

http://inglotcosmetics.com/77.amc.eyeliner.gel/product/19134

بعدين اختارو البلاد الي انتو فيها، لما تختارو حياخذكم اللينك للموقع الي تقدرو تشرو منه الى جانب العملة المناسبة للبلد الي عايشين فيه

http://inglotcosmetics.com/77.amc.eyeliner.gel/product/19134

مثلا انا اخترت الولايات المتحدة و طلع السعر 12£ بعدين تكلمو لو بتزيدو تشرو حاجة او لا و تدفعو بالبطاقة و التوصيل يكون للبيت 

انا نعطي ايلاينر إنقلوت 10/10

Inglot eyeliner 10/10

إن شاء الله عجبكم الموضوع .. أعطوني رأيكم 

الى اللقاء و حماكم الله جميعا أين ما كُنتُم