تنظيم الوقت Tuesday Tip 

اهلًا كيف حالكم ؟ منورين مدونتي❤️

بناء على طلباتكم و لإرضائكم اليوم النصيحة ليها علاقة بتنظيم الوقت ... اكثر من مرة يجيني سؤال اسلام كيف تنظمي في وقتك؟ أسلام كيف قادرة تمشي الرياضة و تقري و تكتبيلنا؟ 

قلت هي نحكيلكم شوية علي يومي و كيف نستغل فيه و منها ممكن تستفيدو و تعرفوني اكثر.

الصراحة الحكاية مش صعبة واجد، قبل ما ترقدو اليوم فكرو بكرة شن عندكم؟ و شن مفروض اديرو؟ ديرو مخطط لثاني يوم، قررو فيه شن تبو تنجزو فيه من مهام.

انا انوض قبل موعد محاضرتي بساعتين و تلث عشان نلبس علي مهلي و ندير لروحي شاي بالزنجبيل ناخده معاي، و مرات ما نلحقش و نطلع علي طول لان الباص ياخد في ساعة كاملة في الصبح عشان زحمة السير و الناس كلهم ماشيين لاشغالهم و دراستهم.

خلاص بعدين شبه اليوم كله يضيع في مكان الدراسة بس لما نروح نحاول أني ننجز اكثر من حاجة، اول شي نرتاح شوية بعين نمشي للرياضة و لما نرجع من الرياضة طبعا لآزم ناخد شاور و بعدين نقعمز علي تليفوني نرد علي مسجاتكم، نقرا مواضيع و نفكر شنو بنكتبلكم الايام الجاية.

ندير في لائحة فيها اقتراحاتكم بش كل مرة نكتب موضوع و نمسحه من الليست و هكي نرضيكم ❤️

هذا لو روحت العشية، أما لما نروح الظهر و يكون في شمس نفرح بش نصور صور للمدونة لان الإضاءة اهم شي للصور.

انا عادة دوامي من الساعة 9 الى ال 4 للعلم فقط :)

انا نسهر واجد، بالذات لما يكّون عندي تسليم مشروع باعتبار تخصصي تصميم ازياء  علي طول عندي موعد تسليم نهائي.

و مرات يكون عندي موضوع مهم بنكتبه في المدونة و نقعد عارفة روحي مشغولة ثاني يوم، فنسهر بش نكمله.

شي ثاني قبل النوم نحب نتفرج علي فيديوات لمدونات ناجحات عالميا، و نقرا مواضيعهم، و نحاول اني نقدملكم أفضل شي ممكن.

اهم شي لما بتنظمو أوقاتكم انكم اديرو قائمة علي تليفوناتكم اكتبو فيها كل شي لازم اديروه، و حاولو تستغلو كل دقيقة و ما اضيعوش الوقت.

معليش لو سهرتو لو لصالح حاجة كويسة و مفيدة، و ما فيها شي لو تعبتو في سبيل الرياضة، انا مرة مشيت لدكتورة و قالتلي الرياضة اهم مِن دراستك.

مش شرط يكون عندكم وزن زايد بش تشتركو في الجيم، بالعكس مهم كل شخص ان يلقى حتى نص ساعة من وقته يمارس فيه اي نوع من الرياضة: مشي، جري، رقص، 

تمارين.

اكيد عندكم نص ساعة في يومكم صح؟ ما فيش عذر يخليكم ما اديروش رياضة ❤️

هدا كله يفيدكم و يفيد صحتكم و صدقوني مش حتلقو وقت تقولو فيه "كساد" لأنكم حتستغلو وقتكم في حاجات مفيدة و ممتعة .

و ما يجي الليل الا تكونو تعبانين و ياخدكم النُّوَّم :)

ان شاء الله نصيحتي عجبتكم و تكون افادتكم بطريقة او اخرى... مع حبي و قبلاتي للجميع ❤️❤️