طريقك لخسارة الوزن بطريقة صحية

خسارة الوزن بطريقة صحية

سر الرشاقة مش ريجيم قاسي و لا حرمان، ما فيش حاجة اسمها معاش بناكل كربوهيدرات لان لو درتو دايت حتقطعوهم فترة و حترجعو، طبعا لما ترجعو لي روتين الاكل الغير صحي الكيلوات يرجعو مع الأسف، و مرات دبل يعني التعب كله عالفاضي...... قصة حزينة صح؟ أكيد ما فيش حد يبي رشاقة مؤقتة.

هدا ليش انا قررت اني نكتب عالموضوع هدا، بعد بحث طويل و بعد ما سالت مدربين جيم و تفرجت على فيديوات وقريت معلومات عرفت ان الطريقة الوحيدة الصحية للرشاقة مش ريجيم ❌ بس اسمه روتين حياة صحي و صدقوني حتتعودو انتو جربو معاي شهر و انا مثلا نديرلكم قروب انبوكس و كل يوم نسال عليكم شن مدايرين و نشوفو التطورات مع بعض.

انا ما اخترعتش شي من راسي.... اول شي ينصح أنكم تاكلو كل خمسة ساعات بش عملية الهضم تكون منتظمة و تهضمو سعرات حرارية اكثر.

بعد الساعة ثمانية او الثمانية و نص بالكتير أبدو الصيام يعني تتعشو بدري.

البرنامج الي حديروه حيخلي شهيتكم تنقص و بالشوية معاش حتقعدو تاكلو بشراهة زي قبل و هدا المطلوب لنتائج تدوم.

في حاجات ممنوع تاكلوهم، زي الخبزة العادية البيضة، و المكرونة البيضة.... مسموح خبزة مصرية كبديل للخبرة العادية، و توست اسمر طبعا، و مكرونة سمرة.

ضروري ضروري ضروري تشربو اقل شي ليترين مياه في اليوم.

اول ما تنوضو اشربو طاسة كبيرة عالريق، و ضروري تفطرو ردو بالكم تفوتو الفطور هدي اهم وجبة في اليوم.

الناس الي يجوعو في رواحهم و ما يضعفوش هدا نتيجة ان الجسم يحساب روحه يتضور جوع بالغصب عليه و ربي خلق جسمنا من جوه زي المستشفى يبدا يحاول يعالج نفسه و يحل المشكلة ف الي يصير انكم مجرد ما تاكلو الجسم يخزن كل شي"هدا ليش الي يديرو في ريجيم قاسي يا دوبك شهر و يسمنو اكثر من قبل"

تقدرو تفطرو كورنفليكس متاع الشعير و الأرز  و تحطو عليه عسل "مش سكر" و تقطعو موزة معاه "بوتاسيوم" يعطي طاقة.

لو جعتو فجاة بدال بشكوط و الحاجات هدي خودو مكسرات غنية بالألياف و تحرق الدهون و في نفس الوقت تشبع واجد، "كل واحد يأخذ علي قد أيده"

الغداء سلاطة و مثلا سمك سلمون في الكوشة و بدال البطاطا المقلية العادية ديرو بطاطا حلوة أصابع، البطاطا الحلوة مفيدة و صديقة الرياضين.

العشاء أرز ابيض و دجاج، او شربة خضار، عادي اي حاجة مفيدة.

لو جعتو بعدها ديرو زبادي حطو عليه عسل و شوية لوز و فروالة.

الزبادي و اللوز و الفراولة يساعدو علي هضم الدهون ❤️ و هدا الي كلنا نبوه.

مرة مرة نحطلكم انا آكلي، و نوريكم كيف نقدر نخلي الياغورت وجبة تشبع󾮟

طبعا ما تنسوش مياه الديتوكس الي حكيتلم عليها، عبارة عن مياه و شرائح ليمون/خيار/فراولة، ديرو كاس و اشربوه خلال اليوم الى جانب المياه العادية او حتى بروحها المهم لترين في اليوم نكملوهم.

و لمفعول اكثر اشربو شاهي اخضر و شاهي بالزنجبيل و القرفة، لو حسيتو معدتكم ما تقبلتش الزنجبيل او القرفة وقفو، اخر شي نبوه مشاكل معدة، بس الي معدته عادي تقلباته و مجرد ما حبيتوش الطعم معليش تحملو حيساعد علي هضم الدهون واجد.

كولو اي حاجة خاطركم فيها مرة في الأسبوع و نسمو هذا اليوم "يوم الغش" يعني نغشو برنامجنا الصحي و ناكلو حاجات خاطرنا فيها... و هكي ما يقعد في خاطركم شي و تضعفو بالشوية و بطريقة صحية و الوزن مش حيرجع ❤️❤️

كلنا توا نصورو صورة بنسموها"قبل" صورو من القدام و الجنب و خلو حد يصور الظهر، بش بعد شهر نصورو صور "بعد" بنفس اللبس و الميزان نفس الشي ممنوع توزنو الا اليوم و بعد شهر يعني يوم 3/4 ❤️

مزال حنقوللكم علي تمارين و اكل و نصائح اكثر بس ما نبيش نطول عليكم

احبكم