مفضلاتي لشهر مارس March Favorites

مساء الخير, كيف حالكم حبيباتي و شنو اخباركم ؟ ان شاء الله كلكم بصحة و سلامة

انا اليوم جبتلكم مفضلاتي للشهر الماضي, مجموعة من الاشياء المختلفة الي لقيت روحي باستمرار نستعمل فيها او نلبس فيها

 نبدو مع اول شئ الي هو الاكسسوارات, تقريبا طول شهر 3 كنت نلبس في الساعة هدي من مايكل كورس قاع الساعة لونه اخضر غامق, طبعا انا حاكيتلكم ان درجة الاخضر هدي موضة الخريف و مستمرة لحد الربيع الساعة ذهبية  و فيها فصوص تمشي مع اللبس السبور و الرسمي

ثاني شئ في الاكسسوارات نظارات من ريبان الموديل اسمه ويفيرير شكلهم بسيط جدا كلاسيكيات لقيت روحي نلبس فيهم شبه يوميا (لما في شمس ) بالذات لما بنمشي للرياضة او طالعة في الصبح

بعدين في العطر هذا من اف سان لوران اسمه مانيفيستو عندي من صيف السنة الي فاتت بس ما كنتش نحبه واجد بس الشهر الي فات مع الربيع و البرودة حسّيت العطر حلو ريحته بالذات الصبح لما نمشي لدراستي نحس فيه العطر فريش

بعدين في الكونتور باليت من ماركة سليك حكيت عليها من قبل بالتفصيل، نستعمل في الكونتور علي عظمة الخد و علي الأنف من تحت فقط باقي الباليت ما نستعملش فيه لان اغلب طلوعي في الصبح فمانحبش نحط احمر خدود فيه لمعة و لا نحب نحط هايلايت لان ما يناسبوش الصبح و الشمس

بعدين في قلم تحديد من ماركة لورد اند بيري اللون جاي شوية بين البيج الوردي و القهوي يعني ترابي و حلو في الصبح طبيعي جدا بالذات لو تحبو تكبرو الشفايف ارسمو بيه لونه ثابت و يدوم فترة طويلة مرات نحط عليه في الروج الي فوق في الصورة ذهبي من ماركة تو فيسد و اسم اللون نود بييتش اللون بيج على وردي و فيه شوية لمعة يعني مش مطفي نحب نحطه في النص و ندمجه و ما نحطش فيه عالشفايف كلهم، لما تحطو روج فيه شوية لمعة في النص يخلي الشفايف يبانو اكبر

اخر شي ماسكارا من لوريال اسمها فلومينيس ميليون لاش ضد الماء طبعا انا نحب ماسكارات لوريال جدا جدا جدا جدا جدا و نفضلهم علي هلبا ماركات غالية هدي الماسكارا تفصل في الرموش عن بعض ما تلصقش فيهم و أطول فيهم و لونها اسود غااامق فعلا تستحق الشراء و ما تخافوش من انها أذوب بكل عشان زي ما قلت انها ضد الماء

 تحت حتلقو قائمة بجميع أسامي مفضلاتي الي ذكرتها و موجودين في الصورة للتوضيح 

تفاصيل :

Michael Kors الساعة

Rayban Wayfarer النظارات 

YSL Manifesto العطر

Sleek Face Form الكونتور كت

Lord&Berry قلم تحديد الشفايف 

Vintage pink درجة اللون

Too Faced الروج

Nude beach درجة اللون

Loreal voluminous million lash الماسكارا 

قولولي شن رايكم في الموضوع؟ هل عندكم مفضلات في شهر مارس الفائت؟ و هل عجبكم هذا النوم من المواضيع او لا؟ 

شكرًا انكم قريتو الموضوع 

مع خالص حبي  🌷