ما هي العناية بالبشرة؟
مساء النور احبائي، ان شاء الله كلكم تكونو بألف خير، انا عارفة اني غبت عليكم فترة بس عندي مشاريع دراسية واخدة وقتي ان شاء الله نحاول نكمل بسرعة عشان نقدر نكتبلكم مواضيع اكثر
اكثر شئ تسالو فيا عليه هو العناية بالبشرة
اول شئ .. شنو العناية بالبشرة؟
العناية بالبشرة في نوعين :
1- طبيعية
2- مستحضرات تجميلية
الطبيعية يعني الزيوت و الزهور و البهارات و الأعشاب
اما المستحضرات فطبعا هما الي نشرو فيهم جاهزات
في عناية يومية و في عناية أسبوعية ، بس في جميع الحالات لازم و ضروري جدا نعتنو ببشرتنا
اول خطوة و اهم خطوة و قبل ما تشرو اي شئ لازم تتاكدو انكم تشربو في كمية مياه كافية، صدقوني تصفي في البشرة بشكل مش طبيعي و تحول الخطوط و التجاعيد الخفيفة
ثاني شي اكل الفواكه و الخضراوات و شرب العصائر المعصورة في البيت يساعد واجد في تنقية البشرة و نضارتها
ايضا انواع الشاي الطاردة للسموم مثل الشاي الاخضر بالزنجبيل و الليمون و القرفة و النعناع، كلهم يطردو السموم و بالتالي البشرة تتصفى
لما تتاكدو انكم اهتميتو بانفسكم من الداخل يجي دور الاهتمام من الخارج
اول شي الترطيب: ضروري يكون عندكم مرطب تحبوه و يمشي مع نوع بشرتكم ، ممكن حتى ترطبو بزيت المهم ما تهملوش البشرة بغض النظر عن نوع البشرة دهني او جاف، رهو لازم منه الترطيب
المفروض يكون عندكم واقي من الشمس ، و كريم مرطب لتحت العين, و مرطب للشفايف
بشرتكم محتاجة مرة في الاسبوع مقشر، و ماسك و الاثنين تشروهم حسب بشرتكم و نوعها
بالنسبة للناس الي يحبو يعتنو ببشرتهم بخلطات طبيعية ان شاء الله حنكتبلكم شوية حاجات انا استعملتها و درتها ايام بشرتي كانت حساسة جدا ما كنتش نقدر نستعمل شي عليها
موضوع اليوم كان فكرة عامة علي البشرة و العناية بها يعني كبداية و مقدمة للمواضيع الجاية
حيكون في موضوع علي كل نوع بشرة، جافة دهنية مختلطة حساسة
مستحضرات و خلطات من تجاربي الخاصة
و كل مستحضر و شنو وظيفته
طبعا لو نكتب عليهم كلهم مع بعض ممكن مش حتكملو قراية بكل لان موضوع البشرة طوييييييل
كونو في الانتظار و اعطوني رايكم و هل عجبتكم الفكرة او لا؟
شكرًا علي صبركم معاي و دائما تذكرو ان الجمال نابع من الداخل ❤️
احبكم
Comments
Post a Comment