كيف نتعرف على نوعية بشرتنا؟
مساء النور
إن شاء الله تكونو كلكم بصحة و سلامة، اليوم حنستمر في سلسلة العناية بالبشرة
طبعا المكياج الحلو اساسه بشرة حلوة. في ناس ربي انعم عليهم ببشرة جميلة و مثالية مش محتاجة الكثير من العناية و لكن الأغلبية عندنا شوية عيوب او حتى واجد عيوب في بشرتنا
اول شي بش نحلو هذي المشاكل لازم نعرفو شنو المشكلة بالزبط ... و شنو نوع بشرتنا؟
لو البشرة فيها الكثير من الإفرازات الدهنية و الوجه يلمع طوال الوقت .. مع وجود مسام كبيرة هذا يعني ان بشرتك دهنية
لو البشرة فيها قشور حوالي الشفايف و الجبهة و الخدود و تحسو ان لما تضحكو بشرتها مضغوطة و يجيكم شعور مؤلم كان البشرة بتتقطع فهذا يعني ان بشرتكم جافة
اما لو عندكم منطقة جسر الأنف تفرز في شوية دهون خلال اليوم و باقي البشرة عادية فهذا يعني مختلطة عادية/دهنية
لو العكس عندكم شوية قشور و جفاف بس في نفس الوقت باقي البشرة عادية فهذا يعني ان البشرة عادية الى جافة
لو البشرة بها الكثير من الاحمرار، متقلبة احيانا جافة و احيانا اخرى دهنية مع وجود ردات فعل و حكة عند استخدام بعض المستحضرات فهذا يعني انكم زيي بشرتكم حساسة
طبعا البشرة الحساسة صعب شوية التعامل معاها لان حتضطرو تغيرو المنتجات الي تستعملو فيها حسب حالة بشرتكم
و لكن بغض النظر عن نوع بشرتك لازم تهتمي بيها و
ترطيبها حتى لو كانت دهنية
البعض يظنو ان البشرة الدهنية لا تحتاج الى ترطيب و هذا اعتقاد خاطئ، البشرة الدهنية محتاجة ترطيب بش افرازها الزايد للدهون يقل
اهم عنصرين لجمال البشرة
الترطيب و النوم و ايضا لازم تتاكدو ان ما تعانوش من فقر دم/ أنيميا و نقص حديد او فيتامينات، في حبوب فيتنامينات و مكملات تقدرو تاخدوهم
انا حطيتلكم الصورة تحت ❤️
الي في العلبة الصفراء اوميقا3 و العلبة الزرقاء سيليكا طبعا السيليكا عنصر مهم لبشرة شعر و أظافر صحية
و اخر شي ناخد في حبوب فيتامين دي عشان بريطانيا شبه ما فيهاش شمس و نحنا الي جايين من بلاد حارة و مشمسة زي ليبيا لازم ناخدو حبوب فيتامين دي طول ما نتواجدو في بلاد ما فيهاش واجد شمس ❤️
ان شاء الله عجبكم موضوع اليوم و باْذن الله حنتعمق اكثر و نحكي علي كل نوع بشرة و شنو تقدرو تستخدمولها بما يعني شنو يناسب بشرتكم بالظبط من مستحضرات عناية و مكياج
لو عجبكم الموضوع لايك لو سمحتو عشان هذا حيساعدني جدا جدا و ايضا مينشن صاحباتكم/أخواتكم حتى تعم الفائدة
Comments
Post a Comment