?Neutral much 

مساء النور لأجمل متابعات، ان شاء الله كلكم بخير

اليوم نبي نحكيلكم علي حاجات انا الفترة هذي نستعمل فيهم و بكثرة 

بما إن الصيف جا أكيد المكياج الي ندير فيه بيتغير، لقيت روحي بديت نميل للألوان الترابية و البرونز اكثر من قبل

: That Gal primer from Benefit

أول شئ نبي نحكي عليه برايمر من ماركة بينيفت اسمه ثات قال، البرايمر هو الطبقة الي نحطوها تحت كريم الاساس، بس انا نحب نخلطه مع كريم الاساس او نحطه علي عظمة الخد من فوق لانه فيه لمعه صحية حلوة

 : Honey bronzer from The BodyShop

ثاني شئ برونزر من البودي شوب ، يعطي برونز خفيف و طبيعي و ناااعم، حلو بكل نحب نمزجه مع احمر خدود لونه وردي فاتح مع بعضهم يخلو الوجه منور و يعطو لوك طبيعي و مناسب للصيف

Lord&Berry Lipliner in #3045 Natural

مؤخرا بديت نستعمل في ماركة لورد اند بيري، و حبيت محدد الشفايف متاع الماركة واجد، عندي ثلاتة الوان و الي موجود في الصورة واحد منهم، لونه ترابي مائل على قهوي ، نرسم بيه شفايفي او بالأحرى نكبر فيهم ههه و بعدين نحب نحط عليه روج لونه اخف منه و هكي يصير في توازن بين الالوان و يعطوني اللون الي نبيه

اسم اللون ناتورال و رقمه 3045

: Mac matte lipstick in Kinda sexy

انا قلت اني نحب نحط لون اخف على محدد الشفايف و اللون الي نحط فيه من ماك اسمه موجود فوق، لون بيج على قهوي على مشماشي، ترابي و مناسب للاستخدام اليومي و ثابت يدوم ساعات طويلة، طبعا هذي ميزة أرواج ماك 

اللون هذا عنده شعبية كبيرة و معروف و محبوب جدا ، و انا شريته بدون ما نجربه و لما روحت الحوش و جربته عجبني واجد و بديت ندير فيه ديما

Estée Lauder Gloss / Michael Kors

: Collection

أظن ان القلوس كان لفترة محدودة فقط، من مجموعة مايكل كورس لاستي لودير، لمعته حلوة و مش لزج و مزعج، انا مش من محبات القلوس عشان ما نحبش ملمسهم على الشفايف بس هذا ناعم 

و لمعته ما فيهاش اي رش 

 : Burberry Body perfume 

عطر بودّي من بيربيري ريحته منعشة و تدوم فترة طويلة 

العطر فيه مزيج من الروائح المختلفة و مكوناته المشمش، المسك، الأزهار البلغارية، أخشاب الصندل و أخشاب الكشمير ، العنبر و الفانليا

الصراحة مزيج رهيب لانه لما تشموه تحسوه دافئ و مش مزعج، يعتبر قوي، و لكن مش قوي خانق بالعكس ريحته حلوة حتى في الصبح

إن شاء الله عجبكم موضوع اليوم قولولي رايكم و شنو تحبو تستعملو الفترة هدي ؟ 

أحبكم