Product review : تجربتي مع منتج

Review : تجربتي/رأيي:

KIKO Radiant Touch 💕 




مساء النور حبايبي.. ان شاء الله تكونو بخير 

اليوم نبي نحكيلكم على تجربتي مع الهايلايت ستيك/الاضاءة من كيكو 

أول شئ نبي نقوله اني انا ما نحبش الهايلايت و اللمعة بصفة عامة و لكن الي في الصورة بصراحة حاجة غير... يعني بجد متأكدة ان لما يكمل الي عندي حنشري منه ثاني لان قعد من المنتجات المفضلة عندي

الهايلايتر هذا من ماركة كيكو ميلانو الإيطالية ، الماركة هدي اسعارها مناسبة و جودتها ممتازة، ان شاء الله كل مرة حنحكيلكم علي حاجة من الماركة هدي عشان تكون عندكم فكرة أفضل.

المهم ... زي ما انتو شايفين ان الاضاءة هدي كريم مش بودرة و هدي ميزة لانها تعطي منظر طبيعي اكثر من البودرة

لازم تعرفو ان الاضاءة لما تنحط على البشرة ممكن تبين العيوب لو في حبوب او حفر في البشرة الهايلايت حيخلي مظهرهم مبالغ فيه .

لهذا انا نفضل انكم تعرفو كيف تحطوه و وين تحطوه بالزبط عشان تبينو جمال بشرتكم مش عيوبها

طبعا انا كنت خايفة ان يكون الهايلايت لمعته قوية و مش طبيعية بس بالعكس يجنن يجنن يُجنن!

نحط فيه فوق عظمة الخد و ندمج فيه بصبعي .. و قدام المرايا نحرك وجهي نشوف الضي لما ينعكس على عظمة خدي 😍😍 إبداع يخلي البشرة تبان صحية ، يعطي في لمعة طبيعية و جذابة يعني بجد مش ممكن يبان وجهك مُلفت و صناعي 

انا عن نفسي نحب المكياج الي يبرز الجمال و يخفي العيوب يعني المكياج الأقرب للطبيعي، نحب ان تكون البشرة تبان صحية ... من قبل كنت ندير في غلطة اني نحط في فاونديشن مطفي و تغطيته قوية فكان يعطي فيا مظهر اني اكبر من عمري و بشرتي ما كانتش سيئة لهالدرجة .. فقط ما كنتش نعرف نهتم بيها، فالهايلاتر هذا يعطي في اللمعة الصحية الي تخلي البشرة تبان شبابية و حلوة واجد،  و الفاونديشن نخلط فيه مع برايمر عشان تغطيته تجيني خفيفة .
لو انتو عايشين في نيوكاسل نبي نقوللكم ان كيكو مش متوفر عندنا .. انا خديته من لندن بس الخبر الحلو انكم تقدرو تشروه اونلاين من


لو موجودين في ليبيا سامحوني ما نعرفش كيف تقدرو تشروه بس ان شاء الله يكونو في صفحات يوفرو في ماركة كيكو 

سعر الهايلايتر 8.50£ ... يعتبر سعر رائع بالنسبة للكواليتي و الحجم الي حتشروه، لانه حجمه ممتاز و اعتقد انه حيقعد معاي فترة طويلة 


الهايلايتر متوفر في لونين واحد مائل علي وردي زي الي عندي و رقمه 101

و اللون الثاني على ذهبي رقمه 100

انا ما نفضلش الاضاءة تكون على ذهبي لهذا خديت اللون الي مائل للوردي 💕💗 نحس انه بناتي اكثر و طبيعي اكثر
ان شاء الله يا رب عجبكم الموضوع اعطوني رايكم و شاركو صديقاتكم و بنات العيلة الحلوات 💕

نحبكم 💗

Comments

Popular Posts