Waist training...Does it really work?
 هوس كورسيت كيم كارداشيان؟ نتائج حقيقية

مساء النور حبيباتي

اليوم نبي نحكيلكم علي تجربتي مع الكورسيت الحراري؟؟؟؟الصراحة ما نعرفش ليش يقولوله حراري انا شخصيا نعرف انه اسمه كورسيت و بس و لكن النوع هذا يستخدم كتدريب للخصر

كيف تدريب للخصر؟ نقوللكم كيف .. وظيفته تلبسوه لساعات طويلة و اديرو رياضة و تاكلو اكل صحي او على الأقل تحاولو تاكلو اكل صحي و هو حيدرب خصركم انه ياخد شكل الكورسيت و بالتالي حجمه يصغر

طبعا هو مش زي السحر و ما يصيرش بين يوم و ليلة، زيه زي الرياضة يبي استمرار و صبر
انا شريت الكورسيت الي في الصورة الي هو فيه سيور و يغطي الظهر كله من الخلف اما من الامام فيجي من تحت الصدر لحد نهاية البطن يعني يغطي جميع الأماكن الي ممكن يكون فيها وزن زايد
مجرد ما تلبسوه حتشوفو الفرق حيشد اي وزن زايد و شي ثاني انه حيخلي الظهر مستقيم يعني وقفتك حتكون سليمة صحية و ميزته انه ما يبانش واجد من تحت الملابس الا لو صاحبتك جت لمساتك بش تتاكد انك ضعفتي و لا لابسة كورسيت هههه
المهم طبعا هو انواع في بالسيور و في بدون و في ايضا الي مخصص للرياضة انا الي شريته متاع الرياضة
الكورسيت فيه تلاتة صفات صكارات، اول ما تشريه تصكريه علي الصفة الاول و كل ما تحسيه بدا يوسع عليك تنتقلي للصفة الي بعدها لما توصلي في التالتة و تحسي ان الكورسيت خلاص بدا مريح معناها تقدري تنتقلي لكورسيت حجم اصغر
بش تتاكدو ان الكورسيت الي شريتره اصلي شوفو التاق/الكاغط الي من جوه لو مكتوب انه مصنوع في كولومبيا معناها اصلي،

لازم لازم لازم قبل ما اي وحدة تشريه تقيس خصرها بشريط الميترو و حتلقو في اي مكان يبيع فيه جدول يُبين القياسات بش تعرفي بالزبط تاخدي اي حجم

و ينصح انك اول يوم تستلميه تلبسيه ساعتين، ثاني يوم أربعة ساعات بعدين لما تتعودي تبدي تلبسي من ستة الى ثمانية ساعات
نجو لرحلتي مع الكورسيت، انا بديت نلبس فيه من اسبوعين فاتو اول يوم لما قسته اضايقت شوية و لبسته ساعتين، ثاني يوم لبسته أربعة ساعات ثالت يوم لبسته تسعة ساعات بعدين تعودت عليه بديت نقعد بيه حتى 14 ساعة
حاليا نقدر نصكر الكورسيت علي اخر صفة صكارات يعني انا نعطي نفسي أسبوع ثاني و حيقعد هدا يجي كبير عليا
طبعا الكورسيت مش حيخليكم تاكلو براحتكم و هدي حاجة كويسة لخسارة الوزن، يعتبر مريح الى حد ما حسب انتو و قدرة تحملكم، انا مثلا درت بيه حتى رياضة و خلاني نعرق واجد
و احلى شي ان حاليا خصري صغر حوالي 3 إنش

هل ننصح بيه؟
نعم و لكن مع شرب مياه بكثرة و اكل صحي او رياضة ، هذا لو تبو تشوفو نتائج مبهرة

هل حنستمر؟
حنستنى نشوف النتائج و بعدين نقرر

لو عندكم اي اسئلة اكتبولي كومينت ❤️ ان شاء الله عجبكم الموضوع ❤️
مع حبي