ماهوالستروبنق و هل هو الكونتور الجديد ؟

.مساء النور و الورد، ان شاء الله تكونو كلكم بخير و صحة و سعاد

بنحكي علي موضوع يخص المكياج اكيد اغلبكم توا سمعتو بالستروبنق الي توا موضة بدل الكونتور

الستروبنق مش حاجة جديدة بكل بكل بكل بكل زي ما البعض يقولو

الستروبنق هو نفسه الهايلايت ... مجرد ان عطوه تسمية اخرى و توا بتبدو تخشو الأماكن الي يبيعو فيها المكياج و الصيدليات الدرق ستورز و تبدو تلقو " ستروبنق كت - عدة ستروبنق"

ستروبنق كريم، ستروبنق باودر و مش عارفة ايش

انا نشوف فيها حكاية تجارية

نرجعو لموضوعنا.. الستروبنق توا موضة لانه صيف و يفضّل الابتعاد عن الكونتور و الالوان الغامقة و كثرة المستحضرات على وجوهنا

الستروبنق عبارة عن هايلايت في الأماكن المعتادة للإضاءة

يعني اديرو هايلايت في مدمع العين، عظمة الحاجب، فوق الحاجب، جسر الأنف، القلب الي فوق الشفايف، منتصف الجبين، و تحت عظمة الخد

يفضّل استخدام هايلايت يعطي ال Wet look المظهر المبلول، البشرة المشرقة الي تلمع بس بدون رش

و هذا هو الستروبنق، تكنيك قديم معروف من زمان، و ايضا من زمان الميك ارتيستس Make-up Artist يديرو فيه

مش حاجة جديدة، بس توا موضة انك اديري واجد هايلايت و تستغني عن مظهر الكونتور القاسي الغامق

هل يناسب الجميع؟ لا

البشرة الي فيها الحفر نتيجة لحب الشباب، و المسام الكبيرة و الحبوب المنتفخة- الهايلايت حيزيد يضخمهم و يُبين العيوب هذي اكثر

هل الناس مضخمين الموضوع؟ اعتقد في رايي نعم لان الهايلايت موجود من زمان، و خصوصا في عروض الازياء ديما يحبو يتجهو لاستخدام الهايلايت تكنيك للموديلز اغلب الوقت ديما بشرتهم تبان نظرة و تلمع

هل الستروبنق هو الكونتور الجديد؟ لا

مش زي بعض بالنسبة ليا، في ناس مش حيقدرو يستغنو عن الكونتور ... بالذات في المناسبات و جلسات التصوير

انا عن نفسي نحب الهايلايت اكثر لاني نميل الى البساطة

.تقدرو تستخدمو واجد مستحضرات، زي اقلام الكونسيلر الهايلايت اللومينايزرس، كريمات و باودر الهايلات

.مش حتحيرو، اكيد عندكم حاجات تقدرو اديرو بيهم اللوك الي خاطركم فيه

ان شاء الله نكون شرحت بطريقة كافية ... و لو في اي اسئلة تفضلو ...و نلتقي في الموضوع القادم ان شاء الله

مع حبي