FlatFormsموضة احذية ربيع/صيف 2016

اهلا و سهلا بكم في مدونتي و مع موضوع جديد خفيف عن موضة أحذية ربيع و صيف 2016

كلنا نعرفو ان في الجو الدافي حلو نلبسو سنادل مفتوحات بالوان فرايحية , بس الشي الثاني المهم الي هو ان السندل او الحذاء المفتوح كل ما يكون مريح كل ما احسن ... صح؟ 

لهذا قلت نحكيكلم على الموضة الي انا عن نفسي حبيتها واجد واجد

اثناء رحلتي الى مدينة ليدز لفت نظري سندل كعب عالي بس كان الكعب متساوي ماشي مع  بعضه ا المعروف باسم (الويدج او الفلات فورم ) ..   طبعا من كثر ما حبيت السندل  قسته و شكله طلع حلو واجد و حسيت انه مريح

تمشيت بيه شوية في البوتيك و قلبي قالي انه مش متعب 

ا لسندل فيه خيوط نربطوهم حولين الكاحل يعطو شكل ناعم فيه انوثة , و الكعب عبارة عن  طبقات محتلفة كالاتي : خشب سعف  و فلين .. اما من تحت فاعتقد ان زي المطاط و هذا الي مخليه مريح 

نخليكم مع الصور

 السعر موجود على الصورة و الي هو 160 جنيه استرليني/باوند و السندل متوفر بثلاتة الوان .. ازرق, بيج, و اسود

 لاحظت ان احذية ماركة (ويسلز) بسيطة و انيقة و  انا عن نفسي ما نحبش المبالغة في المظهر و البهرجة الزايدة

 ستيلا ماكارتني طلعت احذية الفلات فورمز العاليات زي الي في الصورة تحت, سعر الحذاء يتراوح بين ال580 و  ال630 باوند/
جنيه استرليني

  طبعا كلنا نعرفو ان لما مصمم ازياء  يطلع بموضة جديدة, يعني ان حنشوفوها في كل مكان من الهاي ستريت للهاي اند بجميع الاسعار و الجودات المختلفة
 ستيلا ماكارتني طلعتلنا بموضة الفلات الفورم و واجد مدونات عرب و اجانب لبسوهم و من هنا انتشرت شعبيتهم بشكل كبير
 موضة

 الحذاء المفتوح الازرق من زارا  و سعره 35 باوند شبيه الى حد ما بالسندل الي من ويسلز بس بسعر رخيص جدا, التصميم بسيط ... و تقدر كل وحدة حسب ستايلها و تغير من شكله .. تقدرو حتى تضيفو بروش احذية و تغيرو من شكله

انا عن نفسي حبيتهم و اكيد في الصيف حنلبس حاجة هكي ... هدا لو جانا صيف هههه الى حد الان مطر و صقع مع  ان وصلنا شهر مايو بس الباين ان الصيف يقيس في غلاه

المهم اعطوني رايكم ؟ حبيتو الستايل؟ تلبسوه او لا؟

 ما فيش من يكره الراحة و الاناقة لما يجتمعو مع بعض صح و لا مش غلط

ان شاء الله تكونو استمتعتو و استفدتو و شفتو كيف الماركات يستوحو في الاحذية من مصممين الازياء و يوفرو فيهم باسعار اقل و اشكال متقاربة

و هذا اكثر شي نحبه في عالم الازياء .. كلنا نقدرو نهتمو بأناقتنا حسب ميزانياتنا
و كالعادة ,, ما فيش مبلغ في العالم يقدر يجمل قلوبنا
 الجمال ينبع من الداخل و يعكس علينا في الخارج

أحبكم