سوشياليات ❤️

مصطلحات و تعريفات السوشيال ميديا

اهلًا و سهلا بكم في مدونتي من جديد, ان شاء الله كلكم تكونوا بخير و صحة و عافية

بنحكيلكم عن موضوع المسميات المختلفة الموجودة في السوشيال ميديا.  من عادتي اني نحب نقرا تعليقات الناس سواء عندي في صفحتي او في صفحات اخرى عامة لأن الشئ هذا يساعد فيا ننتقي المواضيع الي نبي نتكلم عنها.

اكثر من مرة يصادفو فيا مجموعة تعليقات، فيها بنات يعاندو في بعض عن الفرق بين البلوقرز و الميك أب أرتيست/خبراء التجميل و الحاجات هذي, فقلت ليش ما نوضحش شنو الفرق بين كل مسمى.



و يلا نبدو موضوعنا :

 الميك أب أرتيست:

و هو ممكن يكون شاب أو بنت, يكونوا دارسين تجميل أو عندهم شهادة في هذا المجال سواء من ميك أرتيست معروف أو من كورس, جامعة كلية  الخ



الميك اب أرتيست مفروض يكون شخص فنان و عنده القدرة على تطبيق لوكات مختلفة , مش بس المكياج التجميلي الي متعودين عليه و لكن يشمل مثلا مكياج مرعب, و حروق و تشوهات زي الي نشوفوا فيهم في الأفلام



طبعا في بعض الاحيان يصادفكم ميك اب ارتيست تعلم بروحه او ما يطلق عليه



Self thought makeup artist.


مش شرط كل إنسان ناجح في مجال معين يكون دارسه لان في واجد ناس قدروا يحققوا نجاحات كبيرة بدون ما يتخصصو او يدرسوا المجال اَلي نجحوا فيه

الفاشينيستا:

 اكيد تسمعو في المسمى هذا واجد و هو يطلق عن البنت أو المرأة المعروفة بحبها للأزياء و الموضة, و الي عندها ستايل يميزها و اَلي تنفرد بيه عن غيرها


الفاشينيستا بعض الأحيان يكون عندها مدونة بس غالبا تكون مشهورة على السوشيال ميديا من خلال صورها الي يوضحو طابعها الخاص في الملابس و الاكسسوارات و الي يجذبو في أعداد كبيرة مِن المتابعين 

الفاشن بلوقر:

نفس الشي ولد أو بنت, عندهم مدونة, لان كلمة بلوقر تعني مدون أو مدونة

الشخص هذا يكون عنده اهتمام بالازياء, عنده ذوق مميز في اللبس, و يتكلم عن الموضة و يساعد متابعينه عن طريق الصور و المواضيع الي يطرح فيهم و يكون شخص يعرف اجدد الصيحات و متابع لآخر اخبار الموضة 

البيوتي بلوقر:

شخص يكون عنده مدونة بس بعض الأحيان تلقوهم يعتمدو على السوشيال ميديا أكثر لأن شغلهم كله يركز و يعتمد على صور المكياج سواء يميكجو أنفسهم أو يشتغلو على موديلز

أغلبية البيوتي بلوقرز بس مش الكل ...  عندهم قناة على اليوتيوب فيها فيديوهات مكياج تعليمية و يعرضوا فيها طرقهم و التكنيكات اَلي يحبو يستخدموها + منتجاتهم المفضلة و طريقتهم في العناية بالبشرة و غيره .....




مدون/ة أسلوب حياة Life Style blogger :

مدونة اُسلوب الحياة او اللايف ستايل ... تختلف من شخص الى اخر 

البعض عنده مدونة  و يميل للكتابة و البعض الاخر فقط مكتفي بشبكات التواصل الاجتماعي 

اسلوب الحياة يشمل : الرياضة و الصحة، و السفر و الطبخ ، التصوير، الجمال، العناية بالنفس ، الازياء و الموضة ، معلومات تثقيفية 

يعني شخص يشارك اهتماماته المختلفة بشكل فيه تنويع ، الشي هذا يجذب متابعين مختلفين، كل متابع يحب يشوف الجزء اَلي يستفيد منه

ملاحظة : الي يكون يصور فيديوهات يسمى ڤلوقر, و كلمة ڤلوقر جت من ڤيديو . عبارة عن تدوين بواسطة الفيديو

توا بنحكي على ناس يطلق عليهم مؤثرين او Influencers في عالم التواصل الاجتماعي 

هذو الناس يكونو ناشطين جدا و متفاعلين مع متابعينهم عن طريق اما تطبيق السناب شات / انستقرام / فيسبوك 

طبعا الشي هذا يختلف من شخص آلى اخر

المؤثر ممكن يكون شخص مهتم جداً بالأزياء و الموضة لدرجة ان الماركات يقعدو يتعاملوا معاه 

مثال بسيط :

البلقور الكويتية آسيا طريقتها في اللبس و اختلافها خلاها تلفت النظر هذا الشي خلاها مؤثرة في عالم الازياء و بدت تصمم في مجموعات ملابس تعكس ستايلها

معلومات على السريع ❤️



المدون أو المدونة يكونو يصورو في الصور بأنفسهم, أو عندهم شخص يصورهم.

حاجة ثانية انهم يديرو البحوثات و يكتبوا المواضيع بنفسهم و بأسلوبهم مش كوبي و بيست, و ما يستخدموش صور ما تخصهمش



التدوين مش ساهل لأنك حتكون انت المصور, و الي يعدل في الصور و الشخص الي يكتب في المواضيع و يدير دعاية للمواضيع على شبكات التواصل الاجتماعي لأن ضروري تخلي متابعينك يقرو المواضيع الي تكتب فيهم



حاولت نختصر الموضوع و نبسطه على قد ما نقدر, لو عندكم أي اسئلة اسئلوني

مع حبي، و الى اللقاء في موضوع جديد