50's Glam ! أناقة اللون الأسود

Black elegance

مساء النور، إن شاء الله تكونو بخير, بنحكيلكم قصة قصيرة

يوم 25 مايو كنت طالعة و بالصدفة قابلني القماش الي تحت في الصورة

, 

حبيته و قعدت نفكر فيه طول الوقت و على طول حسيت إن هذا القماش حيكون شئ حلو بالنسة ليا

لما كنت في المكان الي يبيع في القماش سألت المسؤولة في القسم على القماش و  قالتلي ان هذي اخر كمية في بريطانيا في الاسواق, الا لو اتصلت بالمصنع الي يوزع في الاقمشة و درت طلبية خاصة

بما ان القماش عجبني خفت انه يكمل، و الحلو ان كأنو مدايرين عليه تخفيض لأن قريب يكمل و الي فاضل منه جزء صغير

طبعا ما قدرتش نقاوم و خديته و من بعدها مشيت لأقرب مقهى جلست و رسمت التصميم الي جا على بالي من أول ما شفت القماش و قعدت نتخايل فيه 

و هذا التصميم النهائي بعد التطوير 

من بعد فكرة التصميم، استشرت صديقة ماما لو بالإمكان إن نشتغلوا مع بعض في تكملة التصميم و انها تقوم بتنفيذه بما ان عندها خبرة في مجال الخياطة 

أبلة أسماء كانت ردة فعلها حلوة بأنها وافقت رغم ضيق الوقت و حققت رغبتي في اني نلبس فستان من تصميمي

و الأحلى اني لبست الفستان في عرس صديقة قريبة و عزيزة على قلبي

بصراحة فرحت بالاطرائات في العرس بين ناس يبو يعرفوا الفستان من وين و البعض الاخر قدروا يميزو ان الفستان تصميمي ممكن لإني حافظت على طابع/ستايل معين 

 لو اتابعو فيا من فترة طويلة  اكيد تعرفوا إني نحب ستايل الخمسينات و الفساتين الأنيقة المنفوخة و هذا الشي الغالب في طريقتي في الرسم

نخليكم مع الصور

 Details - تفاصيل

الموديل: إليزا

المكياج و التصوير شغلي 

ان شاء الله يكون كل شي نال إعجابكم 

مع خالص حبي