All Inglot Everything

Inglot Haul

مساء النور كيف حالكم؟ ان شاء الله تكونوا بخير

تذكروا لما قلتوا تبوا تشوفوا منتجات انجلوت الي جوني اخر مرة؟

اليوم انا حنوريكم بالصور المنتجات الي وصلوني و حنكيلكم عن بعضهم

كلكم تعرفوا ان ماركة انجلوت من الماركات المفضلة عندي لان اسعارها متوسطة و لكن جودتها تقارن باغلى الماركات

في منتجات من انجلوت و لا يمكن نبدلها بأي منتج من ماركة ثانية زي الدورلاين و الجيل لاينر و بخاخة تثبيت المكياج

بدون ما نزيد نطول عليكم نخليكم مع صور المكياج

زي ما إنتوا شايفين كيسة مليانة حاجات حلوة من إنجلوت ليبيا

أول منتجات حنبدا بيهم الاظافر 

و رقم اللون 667O2M زمالتو 

اللون السماوي هذا المفضل عندي من سبعة سنين و لحد الان ما نقدرش تستغنى عنه

في زمالتو ثاني بين المشماشي و الوردي .. لون خفيف و فيه لمعة

و اخر شي زمالتو طبقة دايموند يعطي لمعة حلوة لأي لون تحطوه

او تقدروا تحطوه على الاظافر مباشرة بش يعطي مظهر لامع و صحي 

Diamond top coat من مفضلاتي 

تنتقلوا لمنتجات نموت فيهم و بجد ما لهمش بديل بالنسبة ليا 

الي هما البخاخ المثبت للمكياج .. هذي ثاني زجاجة نستخدمها

و طبعا الدورلاين و استخداماته المتعددة بصراحة مفيد و عندي منه اثنين و ما نقدرش نعيش من غيره 

لو تحبوا نكتب موضوع على استخدامات الدورلاين اكتبولي كومينت 

أما الحاجات البرونزية/ النحاسية هذي فهما

الومينيتر للوجه و الجسم ... سائل زي الفاونديشن يعطي لمعة و لون برونزي نحاسي صحي كإنك كنتي في البحر

زي الهايلايتر السائل

انا نحب نخلطه منه شوية مع الفاونديشن بش يقعد ديوي و فيه شوية بريق 

أو نحب فيه بروحه فوق عظمة الخد و على الرقبة بش يبرزهم 

Face&body illuminator 63

أما العلبة الزجاجية الصغيرة  فيها بيجمنت .. الى هو زي الاي شادو الغبرة بس صبغته عالية جدا جدا 

Pure Pigment Eye shadow 

و رقم اللون 50

لمعته قوية بكل و طبعا زي ما كاتبين ان المنتج  "بيور بيجمنت" يعني صبغة صافية ... فبجد اللون قوي و زي في الصورة

تنتقلوا لأكثر منتج معروف عند إنجلوت في العالم كله الي هو الجيل لاينر

بس المرة هذي مش الأسود رقم 77

إخترت ألوان حلوة فيها تغيير لأن أنا نحب الايلاينر ملون. و مش ديما نستخدم في الأسود

اللون المائل على أخضر رقمه 87

اللون المائل على ازرق 99

هذا شكل الايلاينر على عيوني

نبذة صغيرة ان الجيل لاينر هذا كريمي، لونه قوي و يدوم فترة 

طويلة.. ما يسيحش من حرارة و لا يتأثر و يذوب و لونه يخف

يعني زي ما تطلعي بيه تروحي بيه

بما إني كنت نحكي على منتجات للعيون .. فننتقلوا للرموش

هذا سيرم مغذي للرموش مفروض يساعد في إطالتهم و يغذيهم  أو يحميهم من التساقط

لو تحبوا ريڤيو على السيرم إكتبولي كومينت

 

توا هذو باودرز .. الباودر الصفراء .. في الطبيعة صفارها أقل

تغطيتها خفيفة جداً ..  ما تحسوش بيها على البشرة 

شغلها إنها تخلي الوجه مات أو مطفي 

نحب نحب منها شوية على جسر الأنف و تحت عيوني على الكونسيلر 

  

 رقمها 302Mattifying pressed powder 

من كوليكشن الفريدوم يعني تقدروا تديروا باليت و معاها حاجات ثانية

ثاني شي باليت فيه قسمين عبارة عن احمر خدود و إليمينتور

يعطي لون خفيف و طبيعي الخدود مع شوية لمعة فيها نضارة

 رقم 204Fusion blush & illuminator 

درتلكم سواتشيز لكل لون بش تشوفوا بعيونكم 

الالوان حلوين 

محدد الشفايف كل يوم نستخدم فيه

بالنسبة للروج السائل لونه فاقع و مُلفت شبيه جدا بروج هروين من ماك

الروج الي رقم 405 كان نصيحة من حبيبة قلبي 

MakeupbyAyah

شوفوا صفحتها على انستقرام ديما تدير في مكياج حلو و تنصح في نصائح حلوة والروج بجد يستاهل

أهم شي ترطبوا شفايفكم كويس

و أخيرا و ليش آخرا فرشة ناعمة نحب نستخدمها فاني نحط فيها كونتور خفيف على عظمة الخد

او نحط بيها الباودر

او الهايلايتر

حجمها مخليها متعددة الاستخدامات 

3P رقم الفرشة

اما الإسفنجة مش قادرة نستخدمها لأن لونها حلو و مش هاين علّيا بصراحة ههه 

إنجلوت ماركة عزيزة عليا جدا من زمان .. و  بعدين شائت الاقدار انهم اول ماركة تهنيني بمناسبة ظهوري على قنوات 

mbcال

و من بعدها درنا مسابقات مع بعض و إهدائات لمتابعيني بالتعاون مع الميك أرتسيت نجلاء ❤️❤️

إن شاء الله تكونوا إستمتعتوا بهذا الموضوع خصوصاً انه إنتوا طلبتوه و انا ما نقدرش نقوللكم لا

نحبكم و لو عندكم إقتراحات يا ريت تقولولي 

و الى اللقاء في موضوع جديد