روتيني للعناية باليدين .. My Hand Care Routine

اهلًا حبيباتي.. كيف حالكم؟ ان شاء الله كلكم بألف خير و اخيرا موضوع العناية باليدين، انا اكثر من مرة نحط في صور لايديا و تسالو فيا شنو سر نعومة ايديك.. او على الأقل الباين من الصور ههه

اول شي روتيني ما فيشي اي شي غريب كله تعرفوه

اول و اهم شئ لازم لازم لازم ترطبو ايديكم علي قد ما تقدرو مش مهم كم مرة حتى عشرة مرات في اليوم استخدمو كريمة تكونو تحبوها و تحسو انها بجد ترطب

انا مرة حطيتلكم صورة كريم من البودي شوب بجوز الهند، و كتبت ريفيو عليها بصراحة ترطب و تنعم

و ايضا في شي ثاني ندير فيه بس مش بشكل روتيني يعني لما نتذكر بس ندير فيه 

الي هو اني ندهن ايديا بجوز الهند و بعدها بفترة نمسحهم، صدقوني جوز الهند يرطب في ترطيب عميق جدا

و في خلطة ندير فيها الي هي زيت زيتون و ليمون للايدين ينعمو و يبيضو بشكل لا يوصف جربوهم و مش حتندمو بكل، ديروها في الليل قبل ما ترقدو و حتشوفو مفعول :)

حاولو انكم اداومو عليها علي قد ما تقدرو لمفعول و نتيجة أفضل 

انا توا بنطلب منكم طلب، لكل أنثى تغسل في اواني المطبخ نبيكم تحطو جنب الحوض صابون سائل لليدين + كريم

بعد ما تغسلو الحاجات و تكملو اغسلو ايديكم و امسحوهم بعدين رطبو بالكريم

طبعا هدا روتين ماما و تعلمته منها ما شاء الله أيديها ناعمات حتى انتو لازم و ضروري اديرو هكي و شوفو الفرق، حتى لما الناس يسلمو علي ايديكم حيلاحظو النعومة 

اليدين حساسات و مهم جدا نعتنو بيهم، فلذلك انا نبيكم تحطو الكريم و صابون الايدين و تصوروهم ليا و وروني انكم بجد بديتو اديرو في نصيحتي، نبي يكون عندكم احلى ايدين، ابعتو الصور لصفحتي على الفيسبوك و فرحوني

و ما تنسوش ديما تحطو كريم في الشنطة عشان كل شوية ترطبو ايديكم الحلوات 

ان شاء الله يكون عجبكم الموضوع شاركو صديقاتكم و أحبائكم و اهم شي قولولي رأيكم 

مع حبي