تجربتي مع كونسيلر ماك

مساء النور
جبتلكم كونسيلر ماك المشهور جدا، أغلبية الناس يعرفوه او سامعين بالكونسيلر هذا.

وظيفته يغطي العيوب و الهالات السوداء، تغطية من متوسطة الى ثقيلة، و مفروض يدوم ساعات طويلة.

طبعا مجموعة درجات الالوان كبيرة "NW" الي هما يجو عالوردي و "NC" درجة اللون تعطي عالاصفر.

معلومة عالسريع هما ماك معقدين الامور لان مجموعة "NW" تعني "Warm" دافئ و لكن درجات المجموعة عالوردي الي هي باردة، و العكس صحيح "NC" يعني "Cold" بس الدرجات يعطو عالدافئ الي هو الأصفر.

فلما بتشرو منهم لازم تحطو الشي هذا في بالكم او اسالو الي يشتغلو عند ماك.

نجو لرأيي في المنتج هدا، انا عندي من فترة و جربته بما فيه الكفاية اني نحكي عليه.

الكونسلير مش حلو كاستعمال يومي لانه تقيل تقيل تقيل،  لا يحبذ انكم تستعملو حاجة قوية عالبشرة لانه طبعا ليه أضرار بالذات منطقة تحت العين حساسة جدا.

الكونسيلر خالي من الزيوت و يعطي مظهر مطفي، و مفروض يدوم 15 ساعة.

 استغليت الفرصة لما مشيت لرحلة اسكوتلندا و استعملته عشان الرحلة مِن الصبح لليل، درت منه الستة الصبح و رجعت البيت مع الساعة تسعة و كان مزال شكله حلو.

بما يعني ان لو عندكم مناسبة استعملوه مش حيخيب الظن.

ما تنسوش ان الكونسيلر مستحيل يبان شكله حلو بدون كريم ترطيب العين، بالذات لما يكون تقيل محتاج ترطيب عميق.

انا من رايي لما بتستعملوه حطوه و استنو شوية على ما بين يستقر عالبشرة بعدين ادمجوه بصبع الخاتم بطريقة الطبطبة او اسفنجة الbeauty blender, او حتى فرشة لو تحبو.

ثبتوه ببدورة خفيفة بدون لون يعني "translucent"

ممكن تغطو بيه لو عندكم حب و لكن مش ديما و مش كل يوم عشان المسام يتصكرو، يعني الي عندهم مشاكل بشرة و حب شباب يفضّل انكم تهتمو بنظافة البشرة و تخلوها تتنفس  احسن من انكم تغطو العيب و تزيدوه مشاكل.

المميزات :

• تغطية قوية
• ما يخططش تحت العين
• ما يديرش بقع و لا قشور
• يدوم ساعات و ساعات طويلا دون ان يتغير
• درجات الالوان متعددة
• السعر كويس من ناحية انكم تحتاجو نقطة منه فالعبوة حتدوم فترة طويلة

العيوب:

• مش للاستعمال اليومي
• العبوة زجاج فممكن تنكسر
• بالشوية رصو لما بطلعو الكونسلير لان مرات يطّلع واااااجد عالفاضي
• ما فيشي حماية مِن الشمس

ان شاء الله عجبكم الموضوع لو تحبو تجاربي الخاصة مع المستحضرات و المكياج لايك و كومينت، و قوليلي شن تحبو تشوفو ثاني؟

و هل استعملتو الكونسيلر هذا او لا؟ عجبكم ما عجبكم شاركوني و مينشن صاحباتكم عشان كلنا نستفيدو ❤️❤️❤️

احبكم جميعا